يوم سعيد

ازيكم كلكم
عيد سعيد ع الدنيا كلها
امبارح قولت انى مش حاسس بطعم للعيد
النهاردة الصبح حسيت شوية بطعم العيد
صحيح راح بعدها بس عادي يعني عاش معايا شوية

النهاردة ايه بقي صحيت علي ستة ونص كدا واصلا كنت نايم خمسة ونص يعني قضيت ساعه نوم المهم صحيت اتوضيت ونزلت الجامع كانوا لسه بادئين صلاة .. لحقت معاهم الركعة الاولي والحمد لله المهم خلصت صلا وعيدت علي كل الناس اللى اعرفها هناك ، روحنا بقي البيت الكبير عند جدو والمفروض نستني الجزار .
الجزار اتأخر ربع ساعه كدا بابا قرر اننا مش هنستناه وهنعمل ايدينا ف " البقرة " ... ايه والله والمفروض اننا نتعامل بقي ، المهم بابا وعمي داخلوا الاوضة بتاعتها وربطوها من رجليها وراحوا ساحبينها برا في حته واسعه قدامها وراحوا مكملين ربط ف رجليها وقالوا هننيمها علي جنبها المهم هوووووووووووب ولقيتها ف الارض المهم اسند يا احمد علشان ما تقومش تاني روحت ساند فيها ، راح بابا منادي علي جدي واستل سكينا واعطاه ايه وقاله يجيب رقبة اللى جابوها وبسم الله ..... والدم ف كل حته المهم سبناها شوية علشان تجيب آخرها وانا واقف كدا جنبها المهم راحت هوب قايمة واقفة ومرمية ف الارض تاني حولتني من كائن أدمي لمصاص دماء الدم مغطيني من ساسي لراسي ( من اخمص قدمي حتى رأسي يعني ) المهم بقي الجزار ما جاش بردو بابا قال ما بدهاش نشتغل احنا فيها بقي ( ملحوظة : بابا عنده ادوات جزار كاملة وادوات كهربية كاملة وكل الادوات اللى ممكن تتخيلها ف الدنيا ) بابا وكل واحد من عمامي اخد سكينه واعملوا سكاينهم ف المسكينة ومثلوا بجثتها خير تمثيل وانا معاهم اكيد بس كمساعد يعني المهم قعدنا نشيل ونحط وقطعنا اللحمة ووزعنا وعملنا كل حاجة وخلصنا علي صلاة العصر كدا ودا كله والجزار لسه ما جاش ، حقيقة مش عارف لو كنا استنيناه كنا عملنا ايه ، بس كانت تجربه لذيذة واول مرة اتوسخ بالطريقة دي اصلا المهم اتغديت وروحت اخدت دش مضاعف ونمممممممممممممممممممممممممممممممممممممت لغاية الساعه تسعه
بعوض بقي بقالى يومين ما نمتش تقريبا ويوم الوقفة ما نمتش غير ساعه وروحت لعبت كورة وانا صايم وهلكت وكل عضلات جسمي ومفاصله بتوجعني اصلا اصلا اصلا اصلا ( بصبح يا سمير بس )
صحيت بقي علي تسعه كدا كيكو اتصل وقالى نروح عندهم ف المعهد ( عندهم معهد كومبيوتر ) ونزلنا الالعاب علي اجهزة المعمل وقضينها نت وورك ، لعبنا شوية ميدل اوف اونر وغالب ومغلوب ونروح ونيجي واللعبة لمن لا يعلم عبارة عن شخص بسلاح وكل واحد معاه الشخصية بتاعه وبيختار السلاح بتاعه ما بين رشاش وسنيبر ( قناص يعني ) وشوت جان واخيرا البازوكا او الار بي جي المهم انا استاذ سنيبر وبازوكا وشوت جان تقولي رشاش اقولك مليش فيه المهم شوية وقالوا عايزين نلعب إيدج اوف إمبايرس ( عصر الامبراطوريات ) وعملنا فريقين :
كيكو وانا وسبييييييييييد ف فريق
وفيرس واحمد جمال ومحمد سعد ف فريق تاني
كان واحد من اروع الباتلز اللى لعبتها تقريبا
عملت جيم راااااااااااااائع بمعني الكلمة لعبنا جيم واحد 3 ساعات وشوية وظبتهم واجهزت عليهم جمييييييييييييييعا وخرجت فعلا منتشي ظبتهم خير تظبيط علي الاطلاق
وكمان قابلت محمد فايز واحد من اعز الاصدقاء وكان بقالى كتير ما شوفتوش وكويس انى عيدت عليه
رجعت بيتنا كدا الساعه واحدة ونص بقي واديني قاعد بزهقكوا ف عيشتكوا ببوستاتي بس انا عارف ان قلبوكوا ابيض وهتستحملوني
المهم بقي اني بجد النهاردة مبسوط
----------------------------------------
ع الهامش
اسف علشان عملت التعليقات للمسجلين تبع جوجل او اوبن اي دي بس الغير معرف اللى لف ع المدونة دي وفورمالين وعلق على كل البوستات ، مش مضايق انه علق علي الاطلاق يعني ، بس معرفش جالي احساس انى اعرف الشخص اللى علق كويس وكنت افضل اوي انه يعلق باسمه
سوري جدا يا جماعه لو الحركة دي ضايقت حد بس انا فعلا بقيت مش بحب الغير معرف ويا ريت محدش يزعل من كدا ومش هيضر حد يعلق باسمه
الاكيد انى ما سمحتش للموقف دا يضايقني ولا يبوظ فرحتي باليوم

ياللا
كل عيد وانتوا احسن ناس ف الدنيا
كل عيد وربنا محقق لكل واحد حلمه
كل عيد وكلنا اجمل واحسن
كل سنة وكل حد ف كل حته علي كوكبي الارض والمريخ ( وعلي المقيمين خارجهم مراعاة فروق التوقيت ) بخير وسلامة وحب وكل حاجة حلوة

7 comments:

marmar said...

يااااااااااااه

كل ده بوست يا بنى
بصرف النظر انى مفهمتش ولا لعبه من اللى انت كتبتهم
بس سيبك

المهم مبروك انك بقيت سعيد وان شاء الله الفح يفضل على طول

وكنت عايزة اعمل اللىانتم عملتوه ده امبارح
اصل برده امبارح روحت اصلى وكالعاده رجعه من الصلاه الساعه 10
ههههههههههه
تراويح بقى
وروحنا البلد والجزار اتاخر برده قعدت اقول لخالى هات اى حد يساعدك واحنا هنتفرج وطبعا بنات خالى موافقين جدا
وخالى يقولى يا بنتى انا مهندس مش جزار اقوله جرب بس
وطبعا على ما الجزار جه كان بعد العصر كنت عايزة انام فروحت بيتنا وياريتنى ما روحت
النهارده كلهم راحوا عند سمر اختى العاشر وانا ادبست انى اعمل غدا لخالى وخالتى كمان
وطبعا لو الاكل مش عاجبهم هيفضحونى وهطلع عالنت
ههههههههههههههههه

اول ما تقرا ردى ادعيلى ان الاكل يعجبهم ولو عاجبهم هاخد من خالتى 50 جنيه رهان بينا انى بعرف اطبخ
هههههههههههه

استنانى بقى بعد المغرب او العشا اما يجوا هقولك عجبهم الاكل ولا لا
ههههههههههههههه

كل سنه وانت طيب يا جيفارا

marmar said...

اخر الاخبار

تم خطوبتى على مازن ابن خالى عنده تلت سنين
هيستنانى على ما اخلص ونعلن فرحنا بقى
هههههههههههههههه

بجد يا جماعه انا فرحانه جدا الاكل طلع حلو اوى ومكنتش متوقعه كده

انا عملت جلاش باللحمه المفرومه وصنيه بطاطس باللحمه ورز
وجلاش صوابع بالمكسرات

قعدت اطبخ من الساعه 12 الى 5
اهىء اهىء اهىء

بس الحمدلله طلع بفايده وبعد ما كلوا حاولت خالتى تنكر ان الاكل مش حلو بس كلت الاكل كله
ههههههههههههه

خدت منها 50 جنيه هعزم ماما وهند على كريب بالعند فى خالتى
هههههههههههههههههههههههههه

Traveller said...

الله هو دا العيد ولا بلاش بصرف النظر عن كمية اصلا اللى فى البوست بس هعديهالك عيد بقى وكل سنة وانت بخير وصحةو سلامة وجمال ومبارك ههههههههه ايوا كدا يا تشى بجد كلامك ومكالمتك معايا امبارح هما اللى حسسونى بطعم العيد بجد بالإضافة للاضحية بتاع النهاردة بس احنا طبعا مسيطرين ع الوضع والجزار جه فى معاده اكيد بس انا كنت متفرج وموزع بس وكمان فرحان فيك علشان استحميت بالدم كان نفسى اشوفك بجد وانت دراكولا كدا يا لا هابى خروف وتعيش وتاخد غيرها يا تشى
:D
تحياتى

زُمُرده said...

يا جااااااااامد
وجالك قلب تنام وتلعب كماااااان بعد ما دبحتو المسكينه

وعيالها اللي اتشردوا ذنبهم ايييييييييييه؟؟؟

ههههههههههههه

كل سنه وانت بخير وصحه ويارب كل احلامك تتحق وعيد سعيد عليك وعلى كل حبايبك

Boba said...

كل سنة وانت طيب يا جميل وبخير وقلب مرتاحو سعادة
ولا بلاش سعادة
احسن سعادك شكلها بتيجي ع الدم
و يوم تحب تبقى سعيد وميكنش في اضحية
تصرفلك في اي حد
على ايه
كل سنة وانت طيب من غير سعيد

Dr. Eyad Harfoush said...

عزيزي أحمد
كل سنة و أنت بالف خير، ذكرى لطيفة مع الأضحية هذا العام، جعل الله لكل عيد يمر عليك اطيب الذكريات
تحياتي و تقديري

صفا said...

:)
عجبنى جداااا المصطلحات اللى كاتبها زى "استل سكينا واعطاه ايه" ومثلوا بجثتها خير تمثيل"بجد جامدة اوى حركة الكتابة دى
وبالنسبة للالعاب فانا زى مروة بالظبط لا افقه فيها شيئ ويا رب كل ايامك سعيد ومبسوط :)