سبع سبعات

تاج من اسامة باشا يوسف مليان سبعات كتير كدا وعلشان انا مش بحب أأجل تاجات قولت اعمله دلوقتى

أولاً:سبع حاجات نفسى اعملهم

1- قناة فضائية مختلفة تساعد فى تشكيل وعي الناس بدل ميلودي والناس

2- مجلة شبابية مختلفة عن كل اللى موجود فى الوسط الثقافي حاليا

3- اعمل حملة مع مكان ليه وزنه زى ساقية الصاوي او جمعية مصر للحوار تكون مفيدة للشباب

4- اعمل مجموعة مدارس بنظام تعليمي مختلف وبمصاريف قليلة علشان نخرج ناس بتفهم

5- يكون ليا شركتي الخاصة اللى متخصصة فى اكتر من حاجة اهمها الكومبيوتر

6- انى لما اموت ما يبقاش زى اي حد لا يبقي يتقال قيمة رحلت وابقي سايب اثر ايجابي يفضل بين الناس

7- السابعة دي فضلت كتير وفى الاخر مش لاقي حاجة معينة نقول مثلا اخلص م الكلية الزفت اللى انا فيها

ثانياً:سبع حاجات ماعرفتش اعملهم

*** تييييييييت تيييييييييييييت تيييييييييييت عفوا السؤال الذي طلبت الاجابة عليه غير متاح حاليا حاول الاتصال فى وقت اخر

ثالثاً:سبع حاجات باقولها دايماً

1- أصلا

2- اوك

3- ألو ؟؟ ( لازم ارد ع التليفون ألو بأسلوب تساؤل مستفز اصلا )

4- مااااااااااااان

5- اشطات

6- جو تو ذا هيل ويز ذا كير اوف ذا جود

7- تييييييييييييييييييييييت

رابعاً:سبع مشكلات فى حياتك ممكن تحلهم الفلوس

1- القناة الفضائية

2- المجلة

3- موقع اقرأ تكون

4-مجموعة المدارس

5- اشتريلي سيرفر خاص بيا

6-شركتي الخاصة

7- اطلع اصيف فى كان او استراليا

خامساً:سبع أماكن بحبهم

1- وسط البلد

2- اسكندرية

3- معهد لوتس الدولي للكومبيوتر ( بيت كيكو يعني )

4- الكورنيش فى اى حته

5- اي مكان انا فيه لوحدي

6- اي مكان انا فيه مع حد بحبه

7- ساقية الصاوي

سادساً:سبع اشخاص بحبهم غير بابا وماما واخواتى

1- ****************

2- ****************

3- فهمي

4- كيكو

5- مصطفي

6- احمد عبد الوهاب

7- رامي وسمير الاتنين فى مكانة واحدة عندي

على فكرة فى ناس كتير جدا بس دول اقرب سبعة بس كل اللى موجودين فى البيست فريندز فى الليست عندي هو من اقرب الناس ليا واللى بفتخر انهم اشخاص موجودين فى حياتي

سابعاً:سبع حاجات بحبهم قوى

1- الكومبيوتر بتاعي

2- الانترنت

3- الكتب

4- الفيفا

5- الشيكولاتة

6- اللب

7- نشوة تحقيق اي هدف

ثامناً:سبع مدونات بتحب تقرالهم

كل اللى عندي ع السايد بار

بس لو قولنا اكتر سبعة بقي

1- للفجر نغرد - دكتور اياد حرفوش

2- حكاوي اخر الليل شقير

3- مصطفي العليمي - ازاز

4- محمود سعودي - بحب الحياة والناس

5- يوتا - بريئة

6- أبو صلاح - تنفيس

7- احمديزم - أحمد رمضان

8- وسام - رؤي

معلش بقي طلعوا تمانية

كدا تمام اوي التاج بقي لمييييييييييييييييييييييين اكيد هيكون لسبعة بردو

1- أحمد فهمي

2- مصطفي العليمي

3- محمود سعودي

4- يوووووووووووووتا

5- أبو صلاح

6-احمد رمضان

7-( رؤي ( وسام

هذا وحتى لقاء أخر لكم مني خير تحية :P

سلامات

تشي

عشرة جنية

- على باب الميكروباص

- والنبي يا ابني شيل عني الكرتونة دي

- شكرا يا ابني إلهي ينجحك ويرزقك من وسع 

- ربنا يخليكي يا حاجة ، انا عملت حاجة دا انا زي ابنك

- ربنا يحفظكوا يا ابني ، اصل دي الكرتونية بتاعه التومين رايحة جايبها من اخر الدنيا علشان العيال ولادي والدنيا بقت مش مستحمله وابوهم بقي ربنا يرحمه

- ربنا يخليهموملك ويخليكي ليهم

..................

- ايوة يا اسطي الناصية الجاية

- حاضر يا حاجة

- ناولني والنبي يا ابني الكرتونة

تبص للكرتونة بحسرة وعليه بقعة زيت كبيرة من اسفلها وصاحت في جزع

- ازازة الزيت انكسرت

لم يدري ماذا يفعل إلا وهو يخرج عشرة جنيهات من جيبه ويضعها خفية فى الكرتونة من الداخل ويناولها الكرتونة وتأخذها لترحل

..................

فى منزلها

- يا حسام يا ابني خد

- ايوة يا اماه

- انا لقيت العشرة جنية دي فى الكرتونة وانا عارفه انها مش بتاعتنا يا ابني تاخدها بكره الصبح توديها المسجد يمكن في غيرنا محتاجينها اكتر منا يا ابني

- حاضر يا اماه انتى تأمري بكرة وانا راجع م الكلية هوديها ، تصبحي على خير

بابتسامه ودعوة بقيمة عشرات العشرة جنية

- وانت من خير يا ابني ، ربنا يسهلك طريقك ويوقفلك ولاد الحلال وينجحك يا ابني وكل اللى زيك

يقبل رأسها ويدها

- ربنا يخليكي ليا يا ست الكل

---------------------

قصة قصيرة من وحي الخيال

يوليو

يوليو

مر 56 سنة وفي انتظار ناصر جديد لنكتب من جديد ناصر 56

انا فى اسكندرية

وفيكي خمري يا اسكندرية
سلمت امري يا اسكندرية
ما اقدرش اشوفه وما اغنيلوش
يا اسكندرية بحرك عجايب
يا ريت ينوبني م الحب نايب
تحدفني موجة علي صدر موجة
والبحر هوجة والصيد مطايب

اغسل هدومي يا اسكندرية وانشر همومي
على شمس طالعه
وانا فيها ..
انا فيها داااااااااااااايب

حيث انها لحظات لا تشتري
للتأريخ ومرة تانية لحظة من اللحظات الفارقة فى حيوات الشعوب انا فى اسكندرية دلوقتى ............ واحشني الكومبيوتر ;)

أقوالي

بعض من كلمات كنت بكتبها اوقات الكلية بين السكاشن ووسط المحاضرات

" دعوني لنفسي ... فالوحدة خير صديق "

" لم نقتفي دوما أثر ... من غابوا عن النظر "

" الحب أن نحب لأجل الحب ... لا أسباب ولا مسببات "

" المحبون كالسائرون على السحب ... لا يدرون من أين ولا إلى أين ولكنهم يسيرون "

" الحالمون فى دنيانا اما ان يعيشوا معذبين ... او يموتوا سريعا ليستريحون "

" السفر إلى المجهول هو أروع سفر ... فهو بلا انتهاء "

" العمر لحظة ... تستحق العيش "

" المصائب والاحزان ... قلما تأتي فرادى "

" لم دوما الخيارات المتاحة ... كلها حمقاء "

" أنا لست ملاكا قد هوى ... ولست بفتى يسيره الهوى "

" ما طار طير وارتفع إلا وبلغ أعالي السحب "

" هناك بعض اشياء تمنعنا عن المضي قدما ... ينبغي أن نتوقف هنا وندع التاريخ يسطر البقية "

تحياتي ..
تشي

Missing - 2

لو حد لقيني يا ريت يقولي علشان محتاجلي قوي

Missing

لسه فى حاجة ناقصه فى حياتي مش لاقيها مع انى محتاجها جدا بس معرفش هيا ايه

اقرأ ... تكون - خلف الكواليس

مبشر العنوان بتاع البوست

اقرأ تكون الحملة والمجلة اللى بدأناها ومستمرين فيها إن شاء الله
واحنا بنخلص فى العدد الاول من المجلة حصلت عجائب وطرائف زي الفل

اول حاجة بدأنا التنفيذ وبدأنا نوزع التاسكس كل واحد هيعمل ايه
لكن يبدو اننا وش نحس وان الحملة راكبها عفريت لكننا هزمناه والحمد لله مع خسائر فادحة
اول ما بدأنا بدأ دكتور اياد وكان اول واحد مخلص المقال الافتتاحي للمجلة وكان دا دافع كبير لينا اننا نكمل
بدأنا واختارنا العقاد علشان يكون اديب العدد وكان عليا انا اخلص ملف العقاد ومقال تاني اخدت 3 ايام بخلص ملف العقاد وبجمع داتا قريت كتيييييييييير جدا وبدأت بقي اكتب باسلوبي بس كان مرهق جدا بس لما خلصت كنت مبسوط جدا اي واحد فى الدنيا بيكون فرحان وبينسي تعبه لما بيشوف ناتج دا قدامه

بدأت أشوف باقي الناس بقي سمير بسم الله ما شاء الله ظبط نفسه ع الاخر وخلص كل الشغل فى وقته تمام يومين كان رافع كل كتب العقاد ومظبطها كلها وكان فعلا اكتر واحد ملتزم وبعده على طول احمد عمر اللى بردو كان بيرفع كتب تانية

اللى عقدني فى عيشتي بقي فهمي يا عم خلص حاضر ومفيش حاجة لغاية ما جابلي الضغط بس الحمد لله رفع الكتب فى الاخر والنت فصل عنده بعدها ولغاية وقت كتابة البوست دا ( اشطات يا مان ) ودي كانت بداية النحس

مصطفي باشا العوليمي :P
بجد تمام التمام يعني فى تلت ايام خلص اللى نااااااااااااس ( واخدين بالكوا ها ) ما خلصوهوش فى شهر وبجد يستحق نرفعله القبعة

اللى جاي باقي شغل المجلة وكله تسييح فخلينا نعمل اسماء كودية علشان محدش يضربني
اول حاجة المفروض كل واحد عنده كذا حاجة يعملها او كتاب كان النساء من الزهرة والرجال من المريخ الكتاب كان فعلا نحس بما تعنيه الكلمة اللى المفروض يعمل نبذه عن الكتاب بنت صديقتنا ( مش راضي اسيح اهو اي خدمة ) وهي بقي من انصار حقوق المرأة اولا النسخة اللى لقيتها والوحيدة المتوفرة الكترونيا وحشة جدا لكن المشكلة ان فى النص مكتوب تعليق كاتبه المترجم للكتاب بيقول
" وهذا يثبت قول رسولنا ان النساء ناقصات عقل ودين "
معرفش هو كاتبه ليه ولا كان حد اصلا طلب رأيه ولا تعليقه المفروض انه بيترجم بس لكنه مستفز وفتح عليا ابواب جهنم المهم بعد اقناع انها تكمل الكتاب بدون النظر للحاجات دي كمل الكتاب نحسه كل شوية النت يفصل مرة ومرة الكهرباء واول ما تفتح الكتاب ضيوف عندنا
عاااااااااااااااااااااااااااااااااااااااا
الكتاب دا فعلا نحس
اخر عمايل الكتاب المشئوم النت قاطع بقاله اكتر من اسبوع والمقال ما خلصش واتأجل للعدد الجاي إن عشنا بقي

تاني نحس بسم الله ما شاء الله قصدي تالت ( محدش يحسد يا جماعة )
كان فى كتاب تاني وهو لا تحزن لعائض القرني ( انا شخصيا مش بحب الكتاب لكن فى ناس بتدعمه ) المهم كان المفروض حد تاني يخلصه ونبذه عنه لكن ليس كل ما يبغاه المرأ يلقاه ويكمل النحس والجهاز يبوظ
هههههههههههههههههههههههههه
يا سبحان الله فعلا شكله نحس مأثر على كل اللى معانا مرة النت يفصل نهائيا والمرة دي جهاز باظ
طبعا كان فى مقالات تانية الحمد لله وصلت بالسلامة من على جهاز بديل ( الحمد لله ) بس وصلت بقي يوم كام ؟؟ يوم 28 ستة يعني قبل يومين من نزول المجلة ( ايموشن واحد بيشد فى شعره )

اخر حاجة بقي كان المفروض نااااااااااااااس ( واخدين بالكوا ) عليهم مقالين يخلصوا واحد عن كتاب والتاني مفتوح حسب الاختيار وكل يوم اقول فين المقال فين المقال ولا حياة لمن تنادي كل شوية نغير الكتاب اللى هيتكتب عنه قلق فى الحضارة فرويد لا لا لا خلينا فى الامال الكبري لتشارلز ديكنز لا لا لا خلينا فى معرفش ايه
حراااااااااااااااااااااااااام
بس الحمد لله ربنا ستر والحاجة وصلت بس يوم كااااااااااااااااااااااااااااااام ؟؟ يوم 30 يعني اخر يوم اللى المفروض كان الديد لاين يوم 25 اصلا

كدا كله تمام وكله بعت الشغل بتاعه والدنيا فل الفل لااااااااااااااااااا لسه
؟؟
فاضل المقال بتاعي
ياااااااااااااااااللهول هو انا لسه ما كتبتوش
اه كنت مأخره ومش عايز اكتبه لان مكانش في الهام وكتبته يوم 30 كنت صاحي 26 ساعة ورا بعض بالظبط روحت فاتح الوورد وحاط ايديا ع الكي بورد وغمضت عنيا وسبتها تعمل ما بدا ليها وبعدين بفتح عيني بس هو دا قشطة كدا تمام اوي
بس بجد كانت حاجة مسخرة جدا انا اللى قاعد ازعق ومقالاتكوا فين والحاجة فين وخلص يا زفت و و و و لغاية ما انا زهقت من نفسي من كتر الزن عليهم ما خلصتش مقالي
ما دمت انا ما خلصتش بقولهم ليه يخلصوا يعني ما إذا كان رب البيت بالدف ضاربا فشيمه اهل البيت انهم هيخلصوا حاجتهم متأخر أكيد

انا بقي صاحي 26 ساعة قولت انام 3 ساعات بالظبط وصحيت علشان كنت لازم انزل رجعت قعدت ع النت ومرضيتش انام ( تقدروا تقولوا سادية ) والصبح بقي ( اصلي بنام نهارا واصحي ليلا ) على 9 كدا قولت انام واصحي على 1 انزل لمصطفي فتحي حفل التوقيع محمد اخويا الصغير كان ليه رأي اخر وفضل يرخم عليا لغاية ما وصلت الساعة 12 ونمت ساعه لا تغني ولا تسمن من جوع وقمت نزلت لمصطفي بردو وخلصت مصطفي وانا شبه سكران بمعني الكلمة بس نزلت وسط البلد لفينا شوية صغيرين وانا راجع بقي عمي كان فى وسط البلد رجعت معاه بالعربية ساعتين من اول ما ركبت لحد باب البيت وانا ناااااااااااااااااااااااااااااااااااااااايم

طلعت البيت كملت قعده ع النت تاني وما نمتش بردو
ادمان اعمل ايه بس فيا

عموما مبروك علينا كلنا اقرأ تكون العدد الاول وإن شاء الله اللي جاي احسن كتير

* انا مرضتش اذكر اسماء بس المرة الجاية هسيح على كبير والبي بي سي والجزيرة بقي وكله مش هرحم :P

تحياتي
تشي أحمد

مممممممممممم طيب

لسه متفرج حالا على فيلم ذا بوكيت ليست ممثلي المفضل دائما مورجان فريمان
مممممممممممممممممممممممممم
بعد الفيلم قعدت افكر فى ماي بوكيت ليست
قبل اى حاجة البوكيت ليست زى ما فهمت م الفيلم انها امنيات المفروض بنحققها فى وقت ما محدد الوقت كان فى الفيلم ان مورجان والاخر اللى مش فاكر اسمه قدامهم بس ست شهور علشان يعيشوا لاصابتهم بالسرطان .................
انا حطيت نفسي مكانهم

قبل اى حاجة انا بكره الوداع جدا علشان دا نفسي اموت قبل اى حد اعرفه علشان ما اتصدمش بشعور فقدان شخص ما

فكرت كتير ايه اكتر حاجات نفسي اعملها قبل ما اموت او مثلا فى حاجات كتير نفسي اعملها فى حياتي لكن لو قولنا انى قدامي بس حاجات معينة اعملها لانى هموت بعد عدد معين من الشهور

فكرت ولقيتها حاجات بالنسبة ليا بسيطة اوي
نفسي اعيش فى بيت مبني من الخشب
قدامي خيارين البيت يكون ف اسكندرية او فى اسوان بس انا حابب اسوان اكتر مش عارف ليه
نفسي اعيش مع الانسانة اللى اختارتها حياتي كاملة بالحب ما يبعدش عنها لحظة نفضل مع بعض بنحب بعض دايما وللأبد

قعدت افكر كتير ملقيتش غير دول لو دلوقتى قالولي فاضلي هتمني اعيش اللى فاضلي مع البنت اللى بحبها وبجد امتلك البيت الخشب دا بس

-------------------------
اسف جدا لكل الناس مش بعلق عندها بس مش قادر فعلا والمود مش بيسمح والتدوينات دي بكتبها كضرورة ملحة علشان مش بحب افكار الكتابات تفضل فى دماغي من غير ما اخرجها ..... أنا كويس

عني - لحظات شتات 2

أشتاق للغاية لأن اكتب تلك التدوينة اللتى لن اكتبها الآن

عن اقرأ ... تكون
اجمل فريق عمل فى الدنيا وليه كان رب البيت بالدف ضاربا


عن اصدقاء حقيقين كل يوم بكتشفهم في حياتي وبيمثل تواجدهم فى حياتي بعد أخر ومعني أخر يستحق معاه العمر انى ادور عليه واحاول اعيشه

حفل توقيع كتاب مصطفي فتحي ويوم اكتر من رائع

فسحة فى وسط البلد ( إن كان لنا اننا نسميها فسحة ) لكنها فسحة من الخنقة والملل الدائم مع ناس من احسن ناس على رأي محمد حمدي أصدقاء اليوم الواحد ( مع اختلاف مقصده عن المعني الحقيقي للكلمة )

اشتاق جدا لشط اسكندرية نفسي اكلم البحر واشم ريحة الهوا المعبق بالملح

مشتاق كمان لحضن كبييييييييييييييييييييييييير لاعز صديق فى الدنيا الواد فهمي اللي بجد مفتقده

قبل ما امشي جملة علقت معايا

Yesterday is history , Tomorrow is mystery , But Today is a gift , That's why it's called present .